ÊŞA DILÊ PÊNÛS – موسوعة جياي كورمنج

ÊŞA DILÊ PÊNÛS

Diyarî gelperwer û welatparêzên Kurd

ـــــــــــــــــــــــــــــــــــــــــ

Gava dilê min lêdixist

Agir û pêtê pê dixist

Xwe hildida jê derdixist

Peyv û helbest û hest û rist

ـــــــــــــــــــــــــــــــــــــــــ

Digot, xameyê xwe derxe

Va daxwaza min bi serxe

Ev dem û dewran û çerx e

Lê biger pênûs bi berxe

ـــــــــــــــــــــــــــــــــــــــــ

Ji min rake her hilîne

Tiştê divêm binivsîne

Di pertûkê de rêxîne

Bo dost û yaran bixwîne

ـــــــــــــــــــــــــــــــــــــــــ

Bêje ey kurdên qehreman

Ey şivan, Karker û axan

Ey zarok û pîr û kalan

Ey xort û keçên dilovan

ـــــــــــــــــــــــــــــــــــــــــ

Êdî bes e zulm û zorî

Bes e jehr û tirş û şorî

Gula buharê diborî

Xwe bi xweşî nekin gorî

ـــــــــــــــــــــــــــــــــــــــــ

Konger, civînan çê bikin

Şev û roj her dem xebat kin

Nameyan bo hev bi rê kin

Hevgirt û yekbûnê çê kin

ـــــــــــــــــــــــــــــــــــــــــ

Bi hev re dost û bira bin

Li hember dijminan peya bin

Xudanê mafê Kurda bin

Şer nekin da ser bi xwe bin

ـــــــــــــــــــــــــــــــــــــــــ

Ava bikin dibistanan

Fêr bikin zêçan û zaran

Keç û kur û jin û mêran

Ta dibin wek rewşenbîran

ـــــــــــــــــــــــــــــــــــــــــ

Bi pilanzan û zanînê

Zanistî xwendin û hînê

Bibin xwendevanên jînê

Diblomatên hunerçînê

ـــــــــــــــــــــــــــــــــــــــــ

Şerm e herdem lomekar bin

Gêj û sist û yan rûsar bin

Dilhejar û belengaz bin

Koledar û tobedar bin

ـــــــــــــــــــــــــــــــــــــــــ

Mafir we baş xwe nas kirî

Kê çi bi serê we kirî

Kon û êla we ar kirî

Bi çi awî talan kirî

ـــــــــــــــــــــــــــــــــــــــــ

Bi peltîqana gemarî

Bi derew vir û olxarî

Bi huneriya neçarî

Hûn ji jor gêrkirin xarî

ـــــــــــــــــــــــــــــــــــــــــ

Qet bang nekin bi aştiyê

Dijmin nabe kurê diyê

Ew nizane biratiyê

Xwe derxînin ji tengiyê

ـــــــــــــــــــــــــــــــــــــــــ

Gelyê zîlan bi bîr bînin

Heyfa şehîdan hilînin

Laşê dijmin daliqînin

Riyên wana hilqetînin

ـــــــــــــــــــــــــــــــــــــــــ

Bila bêjin Kurd nebaş in

Bila bêjin mey dinoşin

Bila bêjin ew serxoş in

Bila bêjin olfiroş in

ـــــــــــــــــــــــــــــــــــــــــ

Bila bêjin har û dîn in

Bila bêjin ew şofîn in

Bila bêjin dil bi kîn in

Bila bêjin çi dibînin

ـــــــــــــــــــــــــــــــــــــــــ

Çunkê me pir got biratî

Me da sitand bi dilpakî

Em her dibên mirovatî

Ew dûr dibin ji civakî

ـــــــــــــــــــــــــــــــــــــــــ

Lew dixwazim hûn li wan xin

Ji welatê xwe bi derxin

Koleyên wana bi darxin

Daxwaza dilan bi serxin

ـــــــــــــــــــــــــــــــــــــــــ

Kurdistanê ava bikin

Melhemê li daxan bikin

Kul û derdan saxa bikin

Seyran li nav baxan bikin

ـــــــــــــــــــــــــــــــــــــــــ

Vaye daxwaza Dilter e

Doza Kurdekî Perwer e

Armanc dirûşma wî şer e

Bi pênûsê Hemkoçer e.

ـــــــــــــــــــــــــــــــــــــــــ