انتقل إلى المحتوى
ŞAR Û ÇIYAYÊN
KURDISTANÊ
(WARÊ BILIND)
ـــــــــــــــــــــــــــــــــــــــــ
Derketim warê bilind û ser çiyan
Da bikim kêf û ger û geşt û seyran
Li bakur û başûr û koçka cihan
Li jor û jêr seranserî Kurdistan
ـــــــــــــــــــــــــــــــــــــــــ
Min dev da hevraz û zozan û çeman
Deryan û golan, çem û deşt û çolan
Ez ketim perav û kort û delavan
Gund û bajar û zevî û gulistan
ـــــــــــــــــــــــــــــــــــــــــ
Ava kaniyan hildide xulxul tê
Ji Ararat û Sîpanê guşguş tê
Bîngol û Zab û Şoşarê xuşxuş tê
Çemê Firatê ber Dicle lêmişt tê
ـــــــــــــــــــــــــــــــــــــــــ
Li ser Amed û Bedlîsê roj hilte
Li Dersîm û Ruha, Botan û Sîrtê
Giham nav xemla xurist û suriştê
Senendac û Hekarî xuya geş tê
ـــــــــــــــــــــــــــــــــــــــــ
Ji Sûlavê, ji Zinta û Xanqînê
Ji Hewlêr û Zaxo û Selehdînê
Ji Duhok û Mihabad û Efrînê
Ji Karkûk û Amûdê û Mêrdînê
ـــــــــــــــــــــــــــــــــــــــــ
Ji Şehrezor û Qars û Nisêbînê
Ji Meraş û Mûşê û Şemzînê
Ji Qamişlo, Kirmanşa û Mêrsînê
Xweş tê hulm û bêhna buhuşta jînê
ـــــــــــــــــــــــــــــــــــــــــ
Hemû dar û ber hêr û daristan e
Xêr û bêr û meywe û êmişxan e
Buhar rengîn e, tev de gulistan e
Havîn germ û tîn e,mêw û bîstan e
ـــــــــــــــــــــــــــــــــــــــــ
Payîz dîn e, ji dar dike fîstan e
Zivistan jîn e, bi berf û baran e
Tiştê baş bede pesna kurdistan e
Kesk û sor û zer û sipî nîşan e
ـــــــــــــــــــــــــــــــــــــــــ
Keçikên welatê me tev dilter in
Hemû çîl û sîs û gewr û esmer in
Rû ji roj û hêv û sêv û dîmzer in
Bejindar û navzirav û lêvper in
ـــــــــــــــــــــــــــــــــــــــــ
Xort bi wan re evîndar û perwer in
Hemû şêr û dilêr û dilawer in
Ew giş ciwan û lawîn û camêr in
Zana û nivîser û him karker in
ـــــــــــــــــــــــــــــــــــــــــ
Kurdistan bi zêr û zîv û alme ye
Bi mermer û morîk û mircane ye
Bi penes û pût dirav û pare ye
Bi hesin, baqir, bafîn û saçme ye
ـــــــــــــــــــــــــــــــــــــــــ
Petrol û kibrît û xazê tê heye
Bi komir û fosfor û kar û xê ye
Her tiştê tê de havil û fêde ye
Ji bingeh de bi navê Kurd daxmeye
ـــــــــــــــــــــــــــــــــــــــــ
KURDISTAN
1996
DERD Û DERMAN
(Keser û hêvî)
Helbest
Hemkoçerê Cezawîr
