SERGEŞTE
ـــــــــــــــــــــــــــــــــــــــــ
Ji kuvanên wê evînê
Dirêjim hêsirên xwînê
Dinalim ez di vê jînê
Kes nîn e min bihêjînê
ـــــــــــــــــــــــــــــــــــــــــ
Sergeşte mam di van nîran
Qet naçe dîlber ji bîran
Nuhtim wan xedeng û tîran
Suhtim wek mûm û xetîran
ـــــــــــــــــــــــــــــــــــــــــ
Îro felek û dewranê
Roj girtî li ser jiyanê
Xûya nabin ji kildanê
Çavên wê dîlber û canê
ـــــــــــــــــــــــــــــــــــــــــ
Dê çawa ez bi bêhriyan
Bibînim wan sêvên çiyan
Bigrim bi dest û tiliyan
Biramûsim can û giyan
ـــــــــــــــــــــــــــــــــــــــــ
Giyan û can ne hêsan e
Bo evîna wê min dane
Hezkirin çendî giran e
Ewqas li cem wê erzan e
ـــــــــــــــــــــــــــــــــــــــــ
Buhayê evînê nîn e
Ger çiqas ew xwe dibîne
Tenê dilkirinek dîn e
Kul û derdan dikewîne
ـــــــــــــــــــــــــــــــــــــــــ
Şiyê
…………………………………….
PÊJNA TE
ـــــــــــــــــــــــــــــــــــــــــ
Ba bi vacî vînê tim tê
Tenê îro mîna min tê
Ketiye germ û hêmin tê
Lew evîna te li min tê
ـــــــــــــــــــــــــــــــــــــــــ
Dengê te li guh min ketî
Hilavêtim dil perpitî
Pêjna te bi ser min ketî
Cerg û cîger veziqitî
ـــــــــــــــــــــــــــــــــــــــــ
Fermo dilê min darivîn
Can û rewan bilerizîn
Xweş bike jiyan û evîn
Eşq û sewdê biseridîn
ـــــــــــــــــــــــــــــــــــــــــ
Ramûsanan bi wan lêvan
Ji min bibe bi wan çavan
Xwe verêsîn ey dilovan
Ta dibînim baxçê sêvan
ـــــــــــــــــــــــــــــــــــــــــ
Da şiyar bim dil jî şabe
Roj ji heyvê ve xûya be
Tu jî bêje lawo rabe
Destê min qet ji te nabe.
ـــــــــــــــــــــــــــــــــــــــــ
Şam
………………………………………
